LAWAS SATOTANG

Berat Tu Balin Rasate
Mangan Nginim No Mo Ruris
Ngantok Konang No Lap Mata

Meluk Ya Bau Lap Mata
Ate Pikir Desa Darat
Meluk Cara Ya Tu Bangun

Ka Tu Bangun Ola Tenrang
Masi Sate Ya Sarusak
Ke Kateman Ling No Nyata

Dapat Ling Sanompo Ngano
Nyata Si Neja Tugita
Tu Sarusak Desa Darat

Rasate Sopo Ke Jangi
Mara Lanang Tengke Turis
Mana Layu No Si Bosan

Na Mu Arap Ya Tu Bosan
Lagi Balong Si Bajatu
Tu Bela Mana Tu Mate

Nan Po Kira Ya Tu Bosan
Min Balangan No Mo Ruris
Tu Satepat No Mo Tepat

Ma Bau Balangan Ruris
Laga Ke Menong Satotang
Lema Belo Mo Panotang

Lagi Kayu Ka Tu Pasuk
Ka Po Sakit Tu Bau Mat
Goyo Tu Ka Dukung Sia

Na Mirik Mana Sajengkal
Satepat Lema Bau Ruris
Biyal Sate Na Mu Turit

Na Turit Ala Na Turit
Tau Pusan Na Tu Turit
Pusan Rota Sala Pikir

Kabiasa Ajak Mikir
Lamin Tempa Dadi Balong
No Si Sala Tu Samaris

Balong Intan Bawa Diri
Bolang Tanja Tukajongar
Edap Rena Alis Ate

Lamin Balong Mo Parange
Alis Ate Patis Boa
Nan Puin Tumung Pamendi

Kabali Datang Pamendi
Ruris No Pendek Ling Bola
Bajampang Ikhlas Ke Reda

Nonda Rungan Bawa Lenge
Kabalong Bae Tu Menong
Nannya Singin Mampis Rungan

Mana Si Ka Pasal Cinde
Min Ka Dadi Tali Lampak
Ya Rik Repa Si Ling Tau

Mana Si Kapasal Lutung
Lamin Dadi Lapis Songko
Soan Jonyong Si Ling Tau

Mana Si Kurang Pang Harta
Konang Mulia Ling Batin
Sai Po Intan No Satabe’

Kelle Si Sugi Gamperak
Min Kajongar Bawa Diri
Tu Rapang Roro Siong Si

Iklan

Perihal admin
Hobi Menulis

Komentar ditutup.

%d blogger menyukai ini: